Aldraðir og öryrkjar geta sótt sér tannlæknaþjónustu til annara landa innan EES og sótt síðan um endurgreiðslu á tannlæknareikningum í kjölfarið.

Sjúkratryggingar Íslands endurgreiða til samræmis við gjaldskrá SÍ sem er aðgengileg á www.sjukra.is undir „Gjaldskrár og bótafjárhæðir – Tannlækningar“

Greiðsluþátttaka Sjúkratrygginga fyrir almennar tannviðgerðir hækkaði 1. febrúar 2024 í 75%.

Undir almennar tannlækningar falla m.a. skoðun, greining, röntgenmyndir, reglulegt eftirlit, tannviðgerðir, rótfyllingar, tannholdslækningar, úrdráttur tanna og laus tanngervi skv. 2. mgr. 4. gr. reglugerðar nr. 451/2013. Aðrir liðir eru í formi styrkja, t.d. krónur og implant eru hámark 60 þús kr. á hverju 12 mánaða tímabili séu tvær eða fleiri krónur/implönt.

Almennir borgarar (aðrir en lífeyrisþegar) þurfa fyrir fram samþykki til að eiga mögulega rétt á kostnaðarþátttöku.

Skila þarf inn eftirfarandi gögnum með umsókn um endurgreiðslu á: https://island.is/tannlaekningar/tannlaekningar-erlendis

  • Viðurkenndur reikningur úr bókhaldskerfi þjónustuveitanda
  • Nákvæm sundurliðun á unnum verkum þ.m.t. sundurliðun verka á dagsetningar, upphæð fyrir hvert verk fyrir sig, númer tanna sem voru meðhöndlaðar og heiti flata tanna ef um viðgerð/fyllingu er að ræða
  • Greiðslustaðfesting
    Röntgenmynd – ef slík var tekin
  • Sjúkratryggingar Íslands taka ekki þátt í ferða- og uppihaldskostnaði.

Sjúkratryggingar Íslands segja “Það er mjög erfitt að segja til um hvað hver einstaklingur fær endurgreitt af tannlæknakostnaði. Það fer eftir einstaklingum, hver réttindastaða þeirra er, fyrri tannlæknameðferð, staða á tannheilsu þegar meðferð er sótt og svo framvegis.

Það þarf í raun að meta hvert mál fyrir sig.”

Dæmi varðandi gervigóma og heilbrýr:
Fyrir hefðbundið heilgómasett greiða Sjúkratryggingar 75% af gjaldskrá SÍ.

Sjúkratryggingar greiða hins vegar ekki smíði króna á implanta/tannplanta í tannlausan góm. Þess í stað greiða Sjúkratryggingar kostnað við heilgóma á tannplanta. Sértu að fá heilgóma, þá greiða Sjúkratryggingar helming kostnaðar við tvo tannplanta í neðri góm og allt að fjóra í efri góm til stuðnings heilgómum”.

Hægt er að senda fyrirspurnir á netfangið tannmal@sjukra.is einnig er hægt að hringja í síma 515 0005.

Almennir bogarar geta sótt fyrir fram um greiðsluþátttöku í samráði við tannlækni ef um nauðsynlegar tannlækningar vegna alvarlegra afleiðinga meðfæddra galla, slysa og sjúkdóma er að ræða og þá getur endurgreiðslan mögulega orðið hærri en almennt.

Stéttarfélög taka flest einhvern þátt í kostnaði félaga við heilbrigðisþjónustu, en það er mismunandi milli félaga. Sækja má um á vefsíðum flestra eða allra stéttarfélaganna.